O vindeiro 20 de setembro, Gondomar será escenario dunha das actividades do ciclo “Os Ceos de Galicia Suroeste”, unha iniciativa que busca achegar á cidadanía á observación do ceo nocturno e promover o astroturismo como novo recurso turístico no territorio.
Esta acción forma parte dun ciclo de 14 actividades gratuítas, que se desenvolverán nos meses de setembro e outubro nos 14 municipios pertencentes ao xeodestino Galicia Suroeste, entre os que se atopa Gondomar, e que permitirán ás persoas participantes iniciarse na observación astronómica, guiadas por profesionais certificadas pola Fundación Starlight.
As prazas serán limitadas, polo que será necesaria inscrición previa a través da web oficial da entidade: www.galiciasuroeste.gal, dispoñible a partir do venres 29 de agosto.
A actividade en Gondomar será unha oportunidade única para gozar das estrelas, coñecer o patrimonio celeste e descubrir unha nova forma de turismo, integrando natureza, ciencia e cultura.
