Search

O Concello de Gondomar renova o seu compromiso coa infancia

Concello de Gondomar e “Aldeas Infantiles” asinaron hoxe a renovación por segundo ano do convenio de colaboración para a continuación de “Acompáñame”, un programa de intervención socioeducativo para a infancia e a adolescencia, que no ano 2023 estableceu un aula de proximidade en dependencias municipais.

 

Trátase dun programa de atención integral para nenos, nenas e adolescentes, principalmente aqueles que se atopan en situación de risco de exclusión social ou especial vulnerabilidade, de entre os 6 e os 17 anos, a través dun centro de proximidade especializado, divididos en grupos de 8 menores por aula que reciben axuda e asesoramento en areas como a formación socio-educativa, apoio psicolóxico, resolución de problemas, autonomía persoal ou sentido de propósito e de futuro.

Cando así o precisan os menores reciben tamén axuda nas tarefas derivadas dos seus centros escolares, fomentando bos hábitos de estudo así como un programa de ocio e tempo libre e participación en proxectos comunitarios.

A través deste convenio o Concello fai unha aportación de 15.000 euros, e facilita o espazo e toda a loxística necesaria (auga, luz, acceso a internet…) así como a colaboración do persoal do departamento de Benestar Socia,  para o correcto desenvolvemento deste programa.

 

Paco Ferreira alcalde de Gondomar subliñou que “este programa que puxemos en marcha o ano pasado, sirve para a integración social de menores, nalgúns casos pertencentes a familias desestruturadas ou con graves problemas sociais ou económicos, que precisan de axuda para o seu mellor desenvolvemento”. “Agradecemos enormemente o traballo de Aldeas Infantiles en favor dos nenos e nenas máis vulnerables”. “É fundamental que as administracións, neste caso o Concello aposte por programas deste tipo que permitan que todos os nenos e nenas de Gondomar poidan acadar unha integración social plena independentemente da súa situación económica ou familiar, e sen dúbida este servizo seguirá sendo unha gran ferramenta para acadar ese obxectivo”

 

 

 

 

 

Novas

Axenda

No event found!